മാറുന്ന മലയാളി

കാല്‍ത്തള കിലുങ്ങിയ പാടത്തിന്‍ വരമ്പിലോ
പാല്‍ക്കുപ്പിയുരുമ്മിയ പാലത്തിന്‍ വഴിയിലോ
കുപ്പിവള പൊട്ടിച്ചിതറും ചിരിയുമായ്
കുട്ടിക്കുറുമ്പന്‍മാര്‍ ചുറ്റിലും തിമര്‍ക്കുന്നു

പാതിയുറക്കത്തില്‍ മായുന്നോരോര്‍മ്മയായ് 
ഭൂതകാലത്തിന്റെ മായാത്ത കാഴ്ചകള്‍ 
നാട്ടിന്‍പുറക്കാഴ്ച നാട്ടാര്‍ക്കുമന്യമോ
നാട്ടുകോമാളികള്‍ നാട്ടിലുമന്യനോ  

എത്താത്ത കൊമ്പിന്റെ അറ്റത്തു തൂങ്ങിടും 
പച്ചമാങ്ങക്കൂട്ടം തേങ്ങിടുന്നു
തുള്ളിപ്പറിക്കാനും കല്ലെറിയാനുമായ്
ഈയിടെയാരും ഇതുവഴി വന്നില്ല

കൈകളില്‍ തൂങ്ങിയ പുസ്തകക്കെട്ടുകള്‍ 
തോളത്തു പേറുന്ന കാഴ്ചകള്‍ ഏറുന്നു
ടിവിയും കമ്പ്യൂട്ടര്‍ ഗെയിമിലും മാത്രമായ്
കുഞ്ഞു കിടാങ്ങള്‍തന്‍ കളികളും ചുരുങ്ങുന്നു

കാല്‍പന്തു കളിയുടെ ഈറ്റില്ലപാടങ്ങള്‍
നാലുനിലകളും മാളികകളുമായ്
കാലികള്‍ മേഞ്ഞൊരു പാതവരമ്പുകള്‍
ബാറുകള്‍ കാറുകള്‍ തിങ്ങിഞരങ്ങുന്നു

മാറിയ ഗ്രാമത്തിന്‍ പൊങ്ങച്ച ലോകത്തില്‍
ബന്ധങ്ങളോക്കെയും വാക്കിലോതുങ്ങുന്നു 
നേട്ടങ്ങള്‍ക്കായെന്നും നെട്ടോട്ടമോടുന്ന 
മലയാളി മാറുന്നു മലയാളം മരിക്കുന്നു